واحــــة الشـــاعر محـــمد الحســـن راشد

عبارة عن مكتبة ادبية للشعراء العرب
 
الرئيسيةاليوميةس .و .جبحـثالأعضاءالمجموعاتالتسجيلدخول

شاطر | 
 

 الشاعر محمد علي ابوقطاطي

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
محمد الحسن راشد
Admin
avatar

المساهمات : 264
تاريخ التسجيل : 15/01/2011
العمر : 1821

مُساهمةموضوع: الشاعر محمد علي ابوقطاطي   الجمعة فبراير 04, 2011 5:48 am







لمحة من حياة شاعرنا محمد علي ابو قطاطي

نقلاً عن جريدة الاحداث
:::::::::::::::::::::::::::::

المكان قرية ريفية ترقد حالمة في أحضان نيلنا الخالد بالضفة الغربية،
هي قرية العجيجة الجموعية إحدى قرى كرري شمال أم درمان،
وفي احدى أيام عام 1931م كان المولود للسيدة زينب بت محمد..
فابتهج الوالد دفع الله ود محمد واقترح اسماً للمولود "محمد علي"
تيمناً بوالده فنشأ في كنف والديه، وعندما بلغ الرابعة أدخله والده
الخلوة لكي يحفظ القرآن في خلوة الشيخ الفاضل الفكي، وفيها
تعلم مبادئ القراءة والكتابة ونسبة لتغيير محل إقامة الأسرة الى
الجزيرة اسلانج تركها ليلتحق بخلوة الشيخ حسن البصري واستمر
فيها لمدة ست سنوات وبعدها طلب من والده أن يلحقه بالمعهد
العلمي بأم درمان وبرغبته الصادقة في التحصيل والقراءة اشترك
في مكتبة أم درمان المركزية.

تلك كانت لمحة من حياة شاعرنا محمد علي ابو قطاطي الذي زرته
في منزله ووجدته مستشفياً يرقد طريح الفراش فهو يعاني من ألم
في المفاصل وبعد عملية جراحية لم تكلل بالنجاح تحول الى الشلل
وبالرغم من ذلك ابتسامته تتحدى الألم. تحامل على نفسه لينهض
من رقدته ويصافحني ولسانه يلهج بالحمد لله...

اكتشاف شاعريته
في بدايته كان يكتب شعر قومي قصائد للأهل والوطن على شكل
المربعات "دوبيت" وكان يعطي أشعاره هذه الى برنامج "مجادعة
بالدوبيت" في اذاعة أم درمان واخرى ارسلها للنشر في جريدة
"الصراحة" لصاحبها عبد الله رجب الذي شجعه في الإستمرار في
الكتابة للاذاعة، وبعد ذلك التقي بالشاعر عمر البنا الذي يعتبره
المكتشف الأول لشاعريته بعد ان ألقى على مسامعه العديد من
القصائد ومن هنا كانت نقطة التحول من الدوبيت الى الشعر الغنائي،
وطلب منه ان يأتي اليه في منزل على حامد البدوي بحي القلعة
ليلاً ليقدمه الى بعض الشعراء، وبالفعل ذهب إلا ان احدهم ازدري
به ونهره قائلاً "يا ولد أطلع بره" فتصدى له عمر البنا وقال له هذا
شاعر "نجيض" وضماه الى رابطة الأدب القومي بالسودان ومنذ
ذلك الوقت صار يكتب الشعر دون توقف.

الأغنيات الأولى
أغنياته الأولى كانت بالرق لأنه كان هو شكل الأداء في تلك الحقبة ي
في الخمسينيات والأغاني تبثها الإذاعة على الهواء لانعدام أجهزة
التسجيل.
والفنانون الذين تغنوا له في بداياته هم: بابكر حمد- علي أبو الجود-
حسن بدير- أولاد شمبات- خالد اسماعيل.
ويقول أبو قطاطي ان شعوره ساعتها لا يوصف وهو يسمع اسمه
يتردد عبر الاذاعة الأم..
وللمرأة في حياته مكانة مقدرة فهي ملهمته التي تدفعه ليكتب
الشعر وكل قصيدة كتبها لها مناسبتها الخاصة فهو عاشق للجمال
أعطى كلماته ملحنة لبعض المطربات وهم الرحمة مكي-
فاطمة الحاج- مني الخير.

الأغنيات الأوركسترالية
تطورت الأغنية السودانية وحلت الأوركسترا الموسيقية مكان الرق
وكان من الطبيعي ان يتعامل مع فنانين جدد وعلى سبيل المثال لا
الحصر هم: عبد الماجد خليفة الذي جاء سعياً لكلماته من مدني
ليتغني بها، وتؤام روحه كما يحلو له ان يسميه الفنان الراحل خليل
اسماعيل الذي حط رحاله بدار أبو قطاطي وقاسمه السكن عندما
جاء من مدينة الأبيض، ومن أشهر ما تغنى به لشاعرنا - الأماني
العذبة- بسحروك- وتوسعت دائرة تعاملاته الشعرية الغنائية لينضم ا
ليه ابن البادية في تساؤل محب كادت الحيرة ان تقتله ليتغنى بأغانيه
– يا ربي هل طاريني قلبو - وبعد أن ذاع صيته تعرف على محمد وردي
الذي كان طالباً بالمعهد العالي للموسيقى وزاره في مقر عمله
بالهيئة القومية للمياه وكان لقاء السحاب الذي أمطر علينا والساحة
الفنية فناً راقياً في – الناس القيافة والمرسال وشن بتقولوا - والى
الآن مازالت قريحته الشعرية تجود بدرر الكلمات وله دواوين شعرية
نذكر منها --نوادر وحكايات – درب المحبة- الفينا مشهودة- ناس أم
درمان- ولكن للأسف كل هذه الدواوين أخذتها لجنة الخرطوم عاصمة
للثقافة ولم ترجعها لا هي ولا ريعها المادي.

تكريم للجدارة

لقد منح الشاعر محمد علي أبو قطاطي نوط الجدارة في مهرجان
الثقافة في العام 1980م من قبل الرئيس الاسبق جعفر نميري
ووسام الجمهورية من جمهورية كوريا في العام 1982م
من رئيس كوريا كيم ايل سونغ
وكرمته العديد من الجهات دار فلاح للغناء الشعبي- وزارة الثقافة
– منتدي روان- اللجنة الثقافية لنادي المريخ- اذاعة الرياضية.

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://bibasudan.own0.com
محمد الحسن راشد
Admin
avatar

المساهمات : 264
تاريخ التسجيل : 15/01/2011
العمر : 1821

مُساهمةموضوع: بسحروك   الجمعة فبراير 04, 2011 5:54 am




بسحروك
الشاعر : محمد علي ابوقطاطي

الفنان : خليل اسماعيل
$$$$$$$$$$$$$$
فى بنات الجيل بشوف حسنك فريد
فيك قوام زى الغصن وكتين يميل
والجمال الفاتن الفات الحدود
وربنا يغطيك من عين الحسود
والله خايف فى مشيتك يسحروك
بسحروك يا السمحة لو شافو الخدود
ولا شافو الأعين المكحولة سود
$$$$$$$$$$$$$$
خوفى بس يالسمحة ما تصيبك عيون
بسحروك فى البسمة لو شافوا السنون
والسمار الباقى ليك يا حلوة لون
والدلال والروقة والنغم الحنون
يا شبيهة الحور بخاف ما يسحروك
$$$$$$$$$$
العجيب كل الحسان منك تغير
شافن الجسم اللطيف زى الحرير
والغزال هابك عشان فيك الضمير
والهلال من نور جبينك يستعير
بسحروك يالسمحه شان ما بشبهوك
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://bibasudan.own0.com
محمد الحسن راشد
Admin
avatar

المساهمات : 264
تاريخ التسجيل : 15/01/2011
العمر : 1821

مُساهمةموضوع: شن بتقولوا    الجمعة فبراير 04, 2011 5:55 am

شن بتقولوا
الشاعر/ محمد علي ابوقطاطي

الفنان / محمد وردي
شن بتقولوا
في الفرح البعذب سيدو

و الريد البضيع زولو
في السال دمعو يبكي قتيلو
في الشايل هموم الناس
همو العندو غالبو يشيلو
في الما راضي بالحرمان
ولا راضي الحنان يمشيلو
ياما قالوا
نية الزول دليل أعمالو
والداير يفوز بحبيبو
مرات مابتتم آمالو
والبتفائل يلقى الريد
مالو الريد بعاكس حالو
في دنيانا
نحن نعيش ما همانا
لما تفوتنا لحظة جميلة
أجمل لحظة تستنانا
الحبان نشيل نديهم
أجمل ريده ما أحلاها
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://bibasudan.own0.com
محمد الحسن راشد
Admin
avatar

المساهمات : 264
تاريخ التسجيل : 15/01/2011
العمر : 1821

مُساهمةموضوع: الفينا مشهودة    الجمعة فبراير 04, 2011 5:57 am

الفينا مشهودة
كلمات الشاعر/ محمد على ابوقطاطى
عناء الراحل / عبدالعزيز محمد داؤود



الفينا مشهودة عارفانا المكارم أنحنا بنقودا
والحارة بنخوضا
$$$$$$$$$$
الزول بفتخر يباهي بالعندو
نحن أسياد شهامة والكرم جندو
ما في وسطنا واحداً ما انكرب زندو
البعجز بيناتنا بنسندو
الليلة بنخوضا
$$$$$$$$$$
ركابين عليهو الناصع أب غرة
نتباشر وقت نلقى الكلام حرة
ما بننفز يمين إن متنا فد مرة
الخواف ما حر منو نتبرا
الليلة بنخوضا
$$$$$$$$$$
للجار والصديق عشرتنا تتمنى
بنصون الأمانة السيدا أمنا
المغرور ندوسو ونعدموا الطنة
شافعنا بيرى الموت في الركاب سنة
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://bibasudan.own0.com
محمد الحسن راشد
Admin
avatar

المساهمات : 264
تاريخ التسجيل : 15/01/2011
العمر : 1821

مُساهمةموضوع: المرسال ....   الجمعة فبراير 18, 2011 2:52 am



مسكين البدا يأمل
وأملو يغلبو تحقيقو
العاشق الجفا المعشوق
وأسهرو ونشاف ريقو
أمش قول ليهو يالمرسال
عساه يراعي ملهوفو
حبيبك بي وراك جارت
عليه وخانتو ظروفو
فقد صبرو وشرد نومو
لهيب الشوق حرق جوفو
شحوب لونو ونحول جسمه
براك تعال سريع شوفو

براي سويتها في نفسي
قلبي الحبا ما واعي
عشق زولا مجافيهو
ماكان للحصل داعي
أقول أتناسى حبو يزيد
تزيد بالتالي أوجاعي
طريق الحب مشيت فيه
تعسر تاني أرجاعي

خطاباتي البوديها
تقول لابتمشي لاحاجة
وديت ليهو زول مرسال
المرسال مشى وما جا
بقيت أنا والنجوم بالليل
سوا نساهر ونتناجى
والناس اللي كانو سبب
رموني وصبحو فراجى .


الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://bibasudan.own0.com
محمد الحسن راشد
Admin
avatar

المساهمات : 264
تاريخ التسجيل : 15/01/2011
العمر : 1821

مُساهمةموضوع: الناس القيافة ..   الجمعة فبراير 18, 2011 2:55 am



في الناس القيافه

حبينا اللطافه
في دروب المحبة
فتنا بعيد مسافه
شفنا عيون كحيله
فتانه وجميله
تعبانين وراها
نجري سنين طويله
لاخلينا ريدها
لابكينا حيله
نطمع في لقاها
وغالبانا الوسيله

نظراتها فترانه
برموشها أسرانا
حبيناها نحنا
ودرنا الموت برانا
كم نحن الحبايب
منتظرين حنانها
الأرواح تشابي
وتتلهف عشانا
أحلى خدود نديه
خفه وجاذبيه
شاقيانا إبتسامه
وطلعه ملائكيه
الوجنات بتشبه
أزهار موسميه
الخصر المضمر
والقامه الطريه

ريادين سماحه
مكتولين سلاحه
الحلوين هواهم
مابدينا راحه
بارينا العواطف
ماخلينا ساحه
لكن السعاده
اقسام مامباحه
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://bibasudan.own0.com
محمد الحسن راشد
Admin
avatar

المساهمات : 264
تاريخ التسجيل : 15/01/2011
العمر : 1821

مُساهمةموضوع: جمال الروح   الجمعة فبراير 18, 2011 3:06 am




أمس حبيت، وأحب اليوم، وأحب باكر
بحب من قلبي.. لا خايف ولا ناكر
***
بحب الناس تكون في سرور وتبسيم يشرح الخاطر
الأطفال بحب القاها في عيونها الفرح ظاهر
وأسراب العصافير في نغم منساب ومتواتر
وحبات الرزاز تنزل من الغيم الندي الماطر
***
بحب لما النخيل ترسل ظلالها على ضفاف النيل
بحب الساقية في حنية تصدح في سكون الليل
بحب القمرة تتجلى وحواليها النجوم اكليل
بحب الخلوه والحيران وهارمونية الترتيل
***
بحب نجمات ليالي الصيف تلالي تبدّد العتمه
وفي وقت الشروق الشمس لما تجينا مبتسمه
وحين تتفتح الأزهار وتتمايل مع النسمه
وموج النيل عزف ألحان وايقاعاتو منسجمه
***
كم في الكون صور روعه، جمال مختلفة ألوانو
إبداع ربنا القادر إله العرش سبحانو
كم من معجزات تملك شعور الزول ووجدانو
والشاعر صدى الإيمان بكون في قلبو ولسانو

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://bibasudan.own0.com
 
الشاعر محمد علي ابوقطاطي
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
واحــــة الشـــاعر محـــمد الحســـن راشد :: الفئة الأولى :: شعراء السودان-
انتقل الى: