الشاعر عمر الطيب الدوش

ولد عمر الطيب الدوش في مدينة شندي 1948م تخرج في معهد الـموسيقي الـمسرح قسم الـمسرح - عام(1974) وهي أول دفعه تتخرج في الـمعهد ومن زملائه هاشم صديق وإسحاق الحلنقي وصلاح الدين الفاضل وناصر الشيخ . وفي قسم الـموسيقي كان محمد وردي وانس العاقب وعثمان مصطفي.. ورائعة الحلنقي (عصافير الخريف) في افادة من صلاح الفاضل يقول فيها إن الدوش قد كتب الـمقطع الأول لأغنية (عصافير الخريف) علي السبورة(..ليه يا عصافير الخريف ) ثـم قام الحلنقي وعلي ذات السبورة مجاوبا.
وسعاد محمد الحسن زميلة فاضلة جمع بيننا العمل في الإدارة العامة للشئون المالية والإدارية بوزارة الدفاع كانت هي في شعبة الحسابات وكنت أنا في شعبة المراجعة وتمتاز بالهدوء وطيب المعشر والأحترام وكانت تحظى بالأحترام والتقدير من جميع زملائها وهي زوجة الشاعر المبدع عمر الطيب الدوش (طيب الله ثراه) وشاعرنا غني عن التعريف فهو من أعلام الشعر في السودان وصاحب الروائع الخالدات ـ الساقية للفنان حمد الريح ـ بناديها والود وتأجوج والحزن القديم للأستاذ محمد وردي ـ وسعاد للأستاذ الكابلي وهذه القصيدة سعاد لا علاقة لها بالأستاذه سعاد فهي قصيدة قديمة كتبها قبل أن يلتقيها.
وقد تحدثت الأستاذه/ سعاد محمد الحسن عن الأستاذ المبدع الدوش وعن قصة الزواج ومواقف آخرى في حوار لها فإلى ذلك الحديث:
كنا ندرس في معهد الدراسات الاضافية بجامعة الخرطوم آنذاك، في فترة حكم مايو 1983، خرج أساتذة المعهد لإستقبال شخص ما لا نعرفه نحن الطلبة وكانوا (متكتمين) عليه، كنا ننتظر هذا القادم بشغف بعد أن عرفنا من الأساتذة أنه صديق عزيز لديهم، فجاءنا شخص أشعث أغبر يحمل كمية من الكتب لا يستهان بها، كنت أول من أصدر تعليقاً عليه وصحت( سجم أمو واخواتو بدل مايجيب ليهم شنطة هدوم جاب ليهم شنطة كتب)،درسنا تاريخ المسرح وبعد شهر على بقاء هذا الأستاذ معنا عرفنا أنه عمر الدوش.
وعن اللقب (الأستاذ أبوحجاب) تروي الأستاذه سعاد:عندما جاء الدوش لتدريسنا كان يعلق حجاباً قديماً على عنقه (ضحكت واردفت بطريقتها المسرحية (أظنو مما سافر كان لابسو)، أطلقت عليه الأستاذ أبو حجاب، في أثناء المحاضرة إنقطع حجابه وهوى على الأرض فتناوله مسرعاً ومده اليّ ووسط دهشتي قال الدوش(أمشي أعملي لي خيط للحجاب دا) ، خرجت احتج بين زملائي وأقول( لي قال لي صلحي الحجاب الأستاذ دا عذبني) ومن الحجاب بدت الحكاية.
وتحكي الأستاذه سعاد حكاية زواجها من الأستاذ الدوش (زواج مخالف للعادات السودانية كان في شهر سبتمبر 1986 ) : أنا اول فتاة تتزوج بلا مهر ودون شبكة، الدوش دفع لأهلي خمسة عشر جنيهاً وقال لي(إنت اغلى من إني إشتريك)، خالاتي زعلو شديد وقالوا لي( الترابة في خشمك إنت ناقصة من البنات شنو)!، كنت مقتنعة بالفكرة ووقتها كنا نناهض المظاهر الفارغة في المجتمع السوداني لذلك قررنا أن نبدا بانفسنا، تم الزواج دون حفلة ولم أرتدي الزفاف، عند المساء إشترينا (جردل) فول وذهبنا الي بيت أخت عمر،الوحيدة التي حضرت عقد القرآن من أصدقائي هي سهير عثمان قوليب، في المساء تجمع أصدقاءنا في بيت أختو، حسب الرسول كمال الدين شال العود وغنى وأصحابي غنوا لي ، وانا ذاتي غنيت فاصل في العرس، وناس بيتنا ذاتهم إشتروا عشاهم من الدكان!
وتقول الأستاذه سعاد:عمر كتاب مفتوح للجميع،بسيط،واضح وساخر جداً للدرجة التي كانت تغضبني منه، سهل ممتنع يمكن لاي شخص أن يتعايش معه، لا يعيش في دور الأستاذ والشاعر، كسول جداً (الموية دي الإ أديها ليه) لا يساعدني في المطبخ لكن كان عنده(حلة) بيعملها كل شهر، عمر ما كان بيرضى أنظف غرفته لأنه كان يكتب الشعر على الأرض ، يكتب في صندوق السجائر وعلى قصاصات الجرائد، كان يكتب تحت شجرة ظليلة في البيت وعندما الحظ أنه إنصرف عني اليها ادرك أنه يكتب في قصيدة أو رواية

موضوع: سحابات الهموم الجمعة فبراير 04, 2011 7:31 am

سحابات الهموم يا ليل
بَكَن
بين السُكات والقول
وباقات النجوم الجَّن
يعزَّن فى المطر
فاتِن عزاكْ
رَجعَن
وشوق رؤياكْ
زمان مشدود على أكتاف خيول
هَجَعَنَ
وصت ذكراكْ
مكان يجرى
يلاقِى السيل
وسِر مدفون بصدْر النيل
ولوا الذكرى
مافى أسف
ولا كان التجنِّي وقَف
وصوت ذكراكْ
رذاذ صفّق على خطوَة بنات
سَجَعَن
وشوق رؤياكْ
حنين لى غيبَهْ فى المجهول
ولولا الذكرى مافى وصول
ولولا الذكرى مافى أصول
ولوا الذكرى مافى شجن
سحابات الهموم
ياليل..
بَكَن..
بَكَن..بَكَن

موضوع: الود الجمعة فبراير 04, 2011 7:33 am

أعيشهْا معاكَ لو تعْرف

دموع البهجَهْ والأفراح

أعيشهْا معاكَ واتأسّف

على الماضى اللّى ولَّىَ وراح

على الفُرْقَهْ الزمان طويل

على الصبر الّى عِشْنَاهو

مع طُول الألم والليل

زمان كُنّا بنَشيل الوُّد

ونَدِّى الوُّد

وفى عينينا كان يكْبَر

حناناً زاد

وفات الحدَ

زمان ما عِشْنَا فى غُرْبَهْ

ولا قاسينا نِتْوحّد

وهسَّع

رُحْنا نتْوجّع

نعيش بالحسرَهْ نتأسّف

على الماضى اللِّي ما بِرْجَع

أحبَّك

لا الزمن حوّلْنى عن حُبّك

ولا الحسرَهْ

وخوفى عليكَ يمْنَعْنى

وطول الإلفَهْ والعُشْرَهْ

وشوقى الليك من طوَّل

لسّه معاي

ولى بُكْرَهْ

موضوع: بناديها الجمعة فبراير 04, 2011 7:37 am

بناديها

وبعْزِم كُلّ زول يرتاح

على ضحكَة عيون فيهَا

وأحْلم اني في أكوان

بتْرحَل من مراسيها

عصافير

نبّتَت جِنْحات

وطارت

للغيوم بيهَا

مسافرِ من فرح لس شوق

ونازِل

في حنان ليهاَ

أغنّي مع مراكب جات

وراها بلاد حتمْشيهَا

واحزَن لي سُفُن جايات

وما بْتلقَى البِلاقيه

بنادِيــــــهَا

ولمّا تغيب عن الميعاد

بفتِّش ليهَا في التاريخ

واسأل عنَّها الاجداد

واسأل عنّها المستقبل

اللسّع سنينو بُعاد

بفتِّش ليها في اللوحات

مَحَل الخاطر الما عاد

في شهقَة لون وتكيَة خط

وفي أحزان عيون الناس

وفي الضُّل الوقَف ما زاد

بناديــــــهَـا

والاقيـــــهَــا

واحِس بالُلقيا زي أحلام

حتصْدِق يوم

والاقيــــــهَــا

واحْلًم في ليالي الصيف

بَسَاهر الليل

واحجِّيـــهَــا

ادوبي ليهَا ماضيهَا

واطنْبِر ليها جاييــهَا

وارسِّل ليها غنوَة شوق

واقيف مرات واْلُوليهَا

بنادِيـــــــــهَــا

وبناديــــــــهــا

وبناديـــــهــا

موضوع: تاجوج الجمعة فبراير 04, 2011 7:41 am

تاجوج بتكْتب بالشمال

منحوتَهْ في شكل اكتئاب

بتْكحَّل الإبل النحيلَهْ

بالمشاوير النبيلَهْ

وتعشِّي ضيفان القبيلَهْ

بالأناشيد الطويلَهْ

موهوبَهْ زي كل البنات

في الأسى المنْسُوج خيال

واتخيّلَت

إنو المُحلَّق حابَّهَا

تاجوج بتحلب من غيوم كسلا المطر

وتوزِّع القش والشجر

بتفرِّق الهم والكدر

حفيانَهْ تجري ورا السراب

تاجوج بتكتٍب بالحراب

تاجوج بتكتِب بالشمال

وبتْرتِّق التوب والنعال

وتمْرُق الهم الموكّر

في قلوب كل الرجال

تاجوج سؤال

تاجوج غزال

تاجوج مُحال

تاجوج خيال

اتخيّلَتْ انّو المحلّق ساكّهَا

بي طريق شاقِي الغمام

يا يتامي

يا غلابَهْ

شوفوا لي تاجوج زمام

موضوع: محمد ود حنينة الجمعة فبراير 04, 2011 7:42 am

دقّتْ الدَلّوُكَهْ

قُلنا الدنيا ما زالت بخير

أهو ناس تعرِّس وتنْبَسِط

تكْكَّتَ سروالي الطويل

سويتْلُو رقعات فى الوسط

فى خشْمِ عضّيت القميص

أجرى وازيّد شوق وانُط

لا مَن وصلتَ الحفلَهْ زاحمتَ الخلق

وركزْتَ

شان البِتْ سُعاد

أصلى عارف جِنَّها فى زول بيرْكِز وينْسَتِر

لكنِّى عارِف إنَّها

لو كلو زول فى الحلة بالسُتْرَهْ إنجَلَد

يانى الآزاها وجِنَّها

برْضِى عارِف أظنَّهَا

دِيمهْ فى صَرَّ ة وشيهَا

يلفحْنى شوق نافِر لَبَد

وركزْتَ للحُرقَهْ المَشَت فوق الضلوع

تِحت الجِلد

ضمّيت قزازتى مرقتَ عِن طَرَف البلد

وسِكرْت جَدْ

وأنا جايىّ راجعِ مُنْتَهى لاقتْنى هِى

قالت "تعال"

كِبْرَتْ كُراعى من الفرح

نُص فى الأرِض نُص فى النِّعال

اتْلخْبَط الشوق بالزَّعل

اتْحَاوروا الخوف والكلام

"ه-يْى يا سُعاد

على ودْ سكينَهْ وكِلْتِي في خشمو الرماد

علي ود سكينَه ومَات أسى

وأنا بِت بلاك ملْعُون أبوى لو كنتَ أرْضَى أعرِّسهْا

وأنا يا سُعاد

وكتين تصُبى سحابَهْ تَنْزِلي زي دُعاش

بفْرِش على روحى واجيكْ

زولاً هِلِك تعبان وطاش

وأنا يا سعاد وكتين أشوفِك ببقى زول

فَرَشولوا فَرْش الموت وعاش)

قالت سُعاد

(بطِّل كلام الجِرْسَهْ انجض يا ولد)

مزّقْت روحى نِتَف

مرّقْتَ من جيب القميص

عرقى وأسق

طبّيت قزازتى وصلتَ لى طَرَف البلد

وسكْرتَ جَد

اذّنت فى الشوك والسَلَم

وسرحْتَ بالناس والغَنَم

وركعتَ للعرقى البِكِر

وقدتَ فى الألم الحِكِر

وحلمتَ زى شالنى ومشَى

فوف زحمة نْبيْ الله الخِضِر

صحَّانى صوت العُمدهْ قال

(مسئول كبير زاير البلد)

قال لينا

(وكَتْ الزول يجِى ، لازِم تقيفوا صفوف صفوف

وتهيّجُوا الخَلا بالكفوف

وتقولوا عاش.. يحيا البطل)

صلّحْتَ طاقيتي الحرير

واتنَحْنَح الحشا بالكلام

ورميتُو من حلقى الوصَل

قُتْ ليهو يا عُمدهْ اختشى

مسئول كبير في الدنيا غير الله اِنْعَدَم

ما شُفْنا زول رضّع صغار

ما شفنا زول نجّح بَهَم

ما شفنا زول لمْلَم رِمَم

لا صِحِينَا عاجِبنا الصباح

لا نُمْنَا غطّانا العَشَم

والحِلَهْ من كلَّ الجِهات محروسَهْ

بالخوف والوهم

ومضينا من زمناً قديم-يا عُمدهْ-مرْسوم انتحار

الموت مُباح

والحب نِطاح

والصِدقِ من جِنس الزِّنا

العافيهْ مولودَة سِفاح

والرغبَهْ مكسورةَ جناح

الحلم والوعد النبيل

الطِفلهْ والأم ، النخيل

الرّنَهْ فى الوتر الاصيل

تلقاهَا فى قاموس نكاح

يا يُمَّه واح..يا حِلَّهْ واح

***
يا سعاد تعالى ولمِّى من كل البيوت

عِدَّة السَفَر الطويل

زَخْرِفى الفجر النهار

شخْبِطى الضُحى والأًيل

المَغْرِب

الفجر

النجوم.

فى صُرَّهْ وارمِيها البحر

خلِّينَا فوق الشك نَعُوم

والعُمدَهْ فاض

العُمدَهْ صار مليون عُمَد

العُمده فيل

جبلاً تقيل

لبْوَهْ وأسد

حَسَنَهْ وغَصِب

جُمْعَهْ وأحَد

بقّيتْ قزازتى

مرقْتَ عِن طرف البلد

وسكْرتَ جَد

وأنا جايى راجِع أجهجهو

لاقانى هو

سايق العساكر والكلاب

رامى بين عيني وعينو

كلب وتَكْشيرهْ وحُراب

ضاقت نِعالى من الزّعل

من تحتهَا اتْمَلمل تُراب

الغيم سكب ضُلو ومشَى

والدنيا غيما سراب سراب

والحِلهْ زى بلداً بعيد

زوَّد بُعاد وقُرُب سُعاد

اتجمَعَت كلَّ البيوت فى راحتَا

زى بِت لِعاب

مجنونَهْ تصرخ فى الزوال

ممزوجَهْ فى الدم واللُعاب

عينيَّ ضاقت نظْرَتهْا

والجوف يطقْطِق بالكلام

قُبَّال يقولوا لي سلام

اتلمُوا حولى بلا نِظام

شال وعِمَّهْ

توب وغُمَّهْ

فاس وطوريَّه وحزام

شالونى بى كُل إحترام

ورمونى فى قَعَر السجن

حصلّنى قبل اليوم يِتم

جارنا المدرِّس ودْ خدوم

قال ليَّ

لا زول قام هتَف

لا كف مشَت بتلاقِى كَف

والعُمدَهْ زى هَمْبول وقف

يا صمت أُف

يا دنيا تُف

وأنا يا سُعاد للشوق نغَم

للهَم عَلَف

الساقيَهْ لسّه مدوِّرَهْ

صوت القواديس والمياه

طلَعَتْ

مَشَتْ

متْحدِّرَهْ

مدَ البصر

لفَّ الظلام

حَوْل الجدوال أسْوِرَهْ

نعْسَان خضارهْا الا نْتَكَى

ورمى الغُصون

متْكسِّرَةْ

مَدّ الخيال

غنّت مُدُن

والساقيَهْ طاحونة الأنين

طُول الليالى

مدوِّرَهْ

تحت الهجير

تحت الظلام

تحت المطر

الساقيَهْ لا زِم تستمر

***

الساقيَهْ لسَّهْ مدوِّرَهْ

وأحمد ورا التيران يَخُب

أسيان يفكّر مُنْغَلِب

ما بين بُكا الساقيَهْ

مابين طُفولَهَ بتِنْتَحِب

فى اللّى ما شين المدارس

فى المصاريف

فى الكُتُب

في اللّى ضاق عنُّو المكان

وهسَّه سافَر

واغتَرب

لِمُدُن بعيدَهْ تنوم وتصْحى

على مخدّات الطَرَب

والساقَيهْ طاحونة الأنين

طول الليالى بِتنْتَحِب

تحت الظلام

تحت المطر

عزِ الشتا

الساقيَهْ ثانيَهْ تقيف تكون

آمال عريضَهْ مُشَتّتَهْ

وأكباد صغيرَهْ مفتّتَهْ

تحت الظلام عِز الشِتَا

أحمد حكى

وسّد الراس الضُراع

والشوف

نواحى النيل تَكَا:

وصّانِى أبُوى

الموج بيهْدِم كُل رخوَهْ

على الجروف

شِد الضُراع

زى المراكبى مع الشراع

لازِم تعرفو الظلم جاي

من وين عليكْ

وافتَح عينيكْ

على زهور الغابَهْ والأدغال

على الاطفال

وعشان يكون الحقِّ ليكْ

تَعْبُر بحور

تَهْدِم جبال

الحق هو هو النضال

والحق فى ساحة مجْزرَهْ

والنصر للفاس

والرجال

ولى سواقى مدوِّورَهْ

موضوع: الحزن القديم الجمعة فبراير 04, 2011 7:45 am

ولا الحزن القديم

إنتِ

ولا لون الفرح

إنتِ

ولا الشوق المشيتْ بيهو

وغلبْنى أقيف

وما بِنْتِ

ولا التذكار ولا كُنْتِ

بتطْلَعِى إنتِ من غابات

ومن وديان...

ومنى أنا..

ومِن صحْيَة جروف النيل

مع الموجَهْ الصباحيَّه

ومن شهقَة زهور عطشانَهْ

فوق أحزانهْا

متْكَّيهْ

بتَطْلَعى إنتِ من صوت طِفلَهْ

وسط اللمَّهْ منْسيَّهْ

تَجينى

معاكْ يجينى زمن

أمتِّع نفسى بالدهشَهْ

طبول بتْدُق

وساحات لى فرح نَوّر

وجمّل للحُزن..ممْشى

وتمشي معاي

خُطانا الإلفَهْ والوحشَهْ

وتمشى معاي... وتْرُوحى

وتمشى معاي وسط روحى

ولا البلْقاهو بِعْرِفنى

ولا بعرِف معاكْ ..روحى

موضوع: اتخـــيلي الجمعة فبراير 04, 2011 7:46 am

إتخيّلي

إتخيّلي الأنهار

ماصابْها أيّ مَرَض

وإتخيلي الأكون

في مهرجان مسْحور

هَدَتْ النجوم للأرْض

واتخيليني وحيد

و أنا فاتني يوم العَرْض

يا نيل صبي وممْشوق

من بهجَة الأمواج

في زفّهْ مُنْسابَهْ

طارت سحابات شوق

لِمْسَت حَشَا الغابَهْ

طارت طيور بِ الكوم

طافت على الاشجار

لِقَتْ النخيل محْموم

غنّت مع الساهرين

غنّت غُنا العاشقين

" يا ماشي فوق النيل

هاكْ الجمال منديل

يا جايي من النيل

هاكْ النخيل اكليل"

واتْخيّليني وحيــــد

أنا والجروف

والسيــــل

ضلمــــــــــت

أقـــول

والشمْسِ في عِزّ الامل

تُهْتَ ومشيتْ

أقول يا نحن يا انتو و

بكيتْ

يا مواعيد

يا صباح من غير وسِم

تُهْتَ ومشيت

ما ضَلّمَتْ

ما بْتَعْرِف الزول البِجِيك

ولا البِجيكَ

بيعْرِفَك

حتى الشبابيك

والزوايا الكان بِتَجْمَع

في حنايا الشكوك

ضلّمتْ

أغْشاكِ يا نفسي الغريبَهْ

من همومي اطلِّعِك

القاكِ واقْفَهْ على الطريق

أحزان بِتفْرح

وتشْتبِك

أفراح بِتحْزَن

وترْتَبِك

لمّنْ رحلتَ مع الغُنا

عِز الأماني و

ضلّمـــــت

مَدّيتْ على الأمل القريب

أشواق كتيرَه و

قَصّرَتْ

في زاويهْ من ضُل الشجون

جابتْ ظُنونا و

قيّلَتْ

كلّمتَ أشجار الخريف

عن شوق نَمَا

في الوحشَهْ والزمن الأسيف

دلّتني اْفتِّش

في المغارِب

والمشارِق

عَن علامات

أو رصيف

ترقُد الأزهار عليهو

يا بنفسج

كُحْلي غالي

وبُتقالي

امشوا انتو

أنا البقِيف

ما ضلّمَـــتْ

موضوع: ســــــؤال ؟ الجمعة فبراير 04, 2011 7:50 am

جِيتْ أسألِك

يا طفلَة الألم الرضيع

تدِّينى خاطْرِك شان أضيع

فى شوق موزّع فى الزحام

يا عذاب الريح للخيام

يا صهيل كَسر اللِّجام

يا خِتَام قبل البدايَهْ

يا بدايّهْ بدون خِتَام

جيتْ أسألِك مين علّمِك

إنّو الزمن فى مرَّهْ ناقِص

ومرّهْ تــــــام

جيت أسألك

الشوق مكتّف فى الطريق

والخوف مداخل للفريق

جيت أسألِك

مين علّمِك لُغة الزهور

مين علمك غضب الحريق

وانت باحَهْ

وانت واحًهْ

وانتِ ذاتِك سكَّة الزول للمضيق

فارْدَهَ السواعد

للزوابع والمطر

للْهَم يَولْوِل للشّجر

عايز أسألِك

مين علّمِك

!لَمّ السلامــَهْ مع الخــطــر

موضوع: وطـــــــــن الجمعة فبراير 04, 2011 7:51 am

حأسأل عن بلد رايح

وافتِّش عن بلد سايح

واسأل عن امانينا

الِّي ما بتدِّينا

صوت صايِح

وأسأل وين مخابينا

إذا جانا الزمن...

لا فِح

واسأل عن بلد مجروح

وعارف الجارحو ليه جارِح

وابكى على بلد ممدوح

وعارف المادحو

ما مادِح

واحْلم بي حلم مسروق

لا هو الليَلهْ

لا امْبارِح

أعلِّق في جناح سَفَري

خطابات لي زمن فجْري

وادْخُل من درِب سرِّي

لِكُلِّ مضاجع الأحزان

واضفِّر من شجر بلدي

بروقاً مارْقَهْ من صدري

حأسأل عن بلد غاطٍ

لحدِّ الليلهْ في الوجْعَهْ

أَنُط فوق سرْجي واتْحزَّم

أقوم من وقْعَةْ

لي وقعًهْ

أخُتْ ايدي البتوجِعْني

على السأم البِراجِعْني

واسأل..

يا وطن يا بيتنا

ليه شوقك مواجِهْني

ليه حُبّك مُجهْجِهني

وليه تاريخ زمن خسران

موكّر لسَّه في شجني؟

حأكْتب لي شجر مقطوع

مسادير

يمْكِن يتْحرك

خطابات لي طِفِل مجْدوع

يقُوم

يجرى

يَقَع

يبْرُك

رسالَهْ لكلِّ قُمْريّه

إذا دم الشقا اتوزّع

على كل البيوت

ما تْرِك

واسأل..

عن وطن رايِح

وادّيكم خبر جارح:

بأنّو جميع جُموع الناس

حيفْضَلوا لا كُراع

لا راس

ونشترى في الدكاكين يوم

مسابِح من دموع الناس

مساحيق من هموم الناس

زَهَج

يتْعَبّا في الأكياس

ونعْلن في المزاد علناً

وترْغي الجوقَهْ والأجراس:

"!نبيع الطِفلَهْ والكرّاس"

واصْرَخ

! ياوطن! يا بيتنا

ليه ما تبقى لينا الساس

قَدُر ما تجري فيك

أفكار...

يزيدوا الحَبْس والحُرّاس

قَدُر ما تجري فيكْ الخيل

تَدُوس الهيبَهْ

والإحساس

واسأل

يا وطن رايح

اذا كل القبور دَخَلت

بيوت الناس

بلا اسئذان

بلا صلوات

بلا أكفان

جريمَهْ اسائل الدّفَان؟

حريمَهْ طَلَب تَمَن قبري

من البايع في أيِّ مكان؟

واقولكَ يا وطن

رايح

واقولك يا وطن

آمر

سلام النّفْسِ ما كافر

ولا كافر

ولا كافر

» البروفسير عبدالله الطيب
» الشاعر اسماعيل حسن
» الشاعر: علي الفزاني
» الشاعر حسن ابراهيم حسن الافندي
» الشاعر محمد طه القدال